2024 senesi qara qış ayınıñ 26-nda Rusiye quvetçileri tarafından tutulğan qırımtatar İsmail Şemşedinov şimdi Aqmescitteki 2-nci SİZO-da buluna. Bir yıldan ziyade tutulğan yeri aqqında malümat yoq edi, dep haber ete Qırımtatar resurs merkezi.
2024 senesi yanvar ayında tutulğanda, quvetçiler Şemşedinovnıñ evini tintti, soñra erkekni belli olmağan yerge alıp kettiler. Tuvğanlarına üç künden soñ onıñnen bağlanmaq mümkün olacaq, dep ayttılar, amma öyle olmadı.
"Olar onı evde olğanı kibi alıp kettiler: futbolka, sport urbası, sport ştanı. Böyle de çıqarıldı. Tışarıda suvuq edi. Eki mikroavtobus onı alıp ketti ve men onı bir daa körmedim", — dep bildirdi Qırımtatar Resurs Merkezine mabüsniñ anası Elzara Abibullayeva.
Tintüv sebepleri añlatılmadı ve tahqiqat areketlerine dair bir de bir vesiqa qaldırılmadı, dep yaza QRM.
Elzara Abibullayeva Qırımdaki Rusiye Federatsiyasınıñ çeşit küç qurulışlarına muracaat etti, amma er yerde onıñ bulunğan yerini bilmeyler, dep cevap berdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
