2022 senesi sentâbr ayından başlap 6-8 biñ qırımtatar Rusiye ordusına askerlikke alınmamaq içün Qırımnı terk etti. Bu aqta Qırımtatar Milliy Meclisiniñ reisi Refat Çubarov "Amerika sesi"ne bergen intervyüsında bildirdi.
Bundan ğayrı, Çubarovnıñ aytqanına köre, Qırımdaki Rusiye akimiyeti adamlarnı toprağından quvmay ve yarımada tışına çıqarmay, amma insanlarnı Qırımnı terk etmek mecbur etken siyasetni alıpbara.
"Qırımnı quvetli poligonğa, bazağa çevirdiler. Ve añlaşıla ki, ilerideki tecavuzları içün qullanğan böyle bir topraqta, işğalge qarşı çıqqan, rusiyelilerge sadıq olmağan insanlarğa ihtiyacları yoq. Böyle insanlar olaraq olar qırımtatarlarnı ve etnik ukrayinlerni belgilediler. Ukrayinanıñ şeytanlaştırıluvı devam ete", — dep bildirdi Çubarov.
Keçende Qırımtatar resurs merkeziniñ idare yolbaşçısı Eskender Bariyev, aprelniñ 20-nden başlap Rusiye akimiyeti Qırımda Ukrayinağa qarşı cenkte iştirak etmek içün erkeklerni daa faal sürette celp etmege başladı, dep bildirdi.
Qırımtatar resurs merkeziniñ kommunikatsiyalar boyunca meneceri Tatyana Savçuk ilhaq etilgen Qırımda Rusiye akimiyeti 15 biñ insannı Rusiye Silâlı quvetlerine çağırmaqnı planlaştıra, dep bildirdi.
Ukrayina prezidentiniñ Qırım Muhtar Cumhuriyeti ve Aqyardaki temsilciligi Qırımda Rusiye Silâlı quvetlerinde hızmet etmege mecbur etilgen Ukrayina vatandaşlarını bu aqta haber etmege çağırdı. Müessisede eminler ki, Qırımda bulunğan Ukrayina vatandaşlarınıñ askerlikten qaçınmaq ıntıluvlarına baqmadan, Rusiye akimiyeti olarnı cinaiy taqip mehanizmleri vastasınen hızmet etmege mecbur etmege tırışacaq. 520 adise aqqında endi belli, olardan 206-sı 2022 senesi fevralniñ 24-nden soñ qayd etildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
