Türkiye devlet başı Recep Tayyip Erdoğan Antaliyada keçirilgen diplomatik forumda 2014 senesi Qırımnıñ işğaline dünya toplulığınıñ qarşılığını tenqit etip, onı yeterli qadar sert olmağanını bildirdi.
"Eger bütün Ğarp ve bütün dünya 2014 senesi Qırımnıñ Rusiye tarafından işğal etilmesine daa sert qarşı çıqsa edi, bugünki vaziyet olur edimi? Yoqsa adalet dünyanıñ bir tarafında çalışa, digerinde ise yoq? Yazıq ki, dünya toplulığı bu adaletsizlikni tüzetmek içün kerekli kibi qarşılıq ve destek köstermedi ve Ukraina öz adaletinde öz başına qaldı", - dedi Erdoğan.
O, Rusiye istilâsınıñ neticelerine, hususan şeerlerniñ ateşke tutulmasına, adiy adamlarnıñ öldürilmesine ve arbiy areketler bölgesinden qaçaqlar aqımına diqqat çekti.
"Bugün biz, problemlerniñ harap etici ve ağırtıcı aqibetlerini köremiz, amma vaqtında irade kösterilse, bütün bular diplomatiya yolu ile al etile bilecek", - dedi Türkiye devlet başı.
Rusiye Ukrainağa silânen ücüm etkeninden berli Türkiye aracılıq rolüni almağa tırışa, prezident Recep Tayyip Erdoğan eki memleketniñ prezidentlerinen telefonda laf etip, Vladimir Putin ve Volodımır Zelenskıynıñ körüşüvini teşkil etmege azır, dep bildirgen edi. Türkiye Ukraina topraq bütünligine qoltuta ve oña silâ bere, amma Rusiyege qarşı sanktsiyalar kirsetmege istemey.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
