Aq qorçalayıcılar yıl neticelerini çıqarıp, işğal etilgen Qırımda kütleviy tutuvlar çoq olğanını qayd ete.
«Bu yıl kütleviy tutuvlarnen farqlaşa – mart adise-vaqialarını hatırlañız, birden tintüvler keçirilgen ve «Qırım birdemliginiñ» faalleri tutulğan edi. Cemaatçılıqnı ve halqara teşkilâtlarnı Qırımda insan aqları bozulğanından haberdar etmege tırışqan insanlar», – dep ayttı «Qırımtatar resurs merkeziniñ» reisi Eskender Bariyev Qırım.Aqiqat Radiosınıñ yayınında.
Onıñ aytqanına köre, 2019 senesi diniy sebeplerden apis cezaları ve taqipler oldı, «Hizb ut-Tahrir» ve İyegova şaatlarınıñ davaları boyunca.
«OSCEde Rusiye onıñ yurisdiktsiyası altında bütün dinler, atta Ukraina pravoslav kilsesi serbest inkişaf ete bile, dep ayta. Diger taraftan, olar «Hizb ut-Tahrir» ve İyegova şaatları etrafında vaziyetni faal sürette menfiy kerginleştirgen edi», – dep qayd etti Bariyev.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
Rusiye akimiyeti milliy ve diniy sebeplerden taqip olğanını inkâr ete.
Qırımtatar Resurs Merkezi – qırımtatarlarnıñ siyasiy ve cemaat faalligi seviyesini arttırmaq, qırımtatar halqınıñ aq ve serbestliginiñ qorunmasına yardım etmek, qırımtatarlarnıñ milliy kimligini saqlap qalmaq, qırımtatar medeniyetini inkişaf ettirmek maqsadınen qurulğan cemaat teşkilâtıdır.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
