2023 senesiniñ başından bugüngece Qırım sakinleri, esasen, Rusiye ordusını "itibardan tüşürüv" içün bir million rubleden çoq cöreme ödegenler. Bunı Qırımtatar resurs merkeziniñ başı Eskender Bariyev haber etti.
Onıñ sözlerine köre, 40 memuriy ceza adisesi qayd etilgen. Olardan 10 adisede para cezası qırımtatar halqınıñ temsilcilerine aittir.
Bariyevniñ sözlerine köre, Qırımda sözde "diskreditatsiya"nı taqip etmek içün yarımada sakinleriniñ içtimaiy ağları şiddetli şekilde köz etile — "olar sözge, resimge ve atta başqasınıñ yazısına begenmege ilişe bileler".
Rusiyede ve işğal etilgen topraqlarda Ukrayinanı desteklegen faallerniñ taqip etilmesi devam ete. Rusiyege qoltutqan bloger Aleksandr Talipov Telegram kanalında Ukrayina tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını "itibardan tüşürgeninde" qabaatlanıp, memuriy ve cinaiy mesüliyetke çekile. Ukrayina prokuraturası Talipovğa qarşı "milletlerara nefret doğuruv" maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
