2024 senesi devamında Rusiye akimiyeti tarafından siyasiy ve diniy davalar boyunca mahküm etilgen eñ azından 29 qırımlı Rusiye Federatsiyasınıñ çeşit penitentsiar müessiselerine avuştırıldı. Bu malümatnı "KrımSOS" talilcisi Yevğen Yaroşenko bildirdi.
"Bazıları Rusiye SİZO-larından tüzetüv koloniyalarına ya da apishanelerge çıqarıldı, bazıları apishaneden tüzetüv koloniyalarına avuştırıldı, anda memuriyetniñ munasebeti sıq-sıq apishanelerden daa sert ola", — dep bildirdi Yaroşenko.
"KrımSOS" talilcisi şunı da bildirdi ki, 2024 senesi devamında Rusiye quvetçileri eñ azından 10 qırımlını Aqmescit SİZOsından Rusiye mahkemesiniñ oturışuvlarında iştirak etmek içün Rostov-na-Donu SİZO-sına etap etti..
"Siyasiy sebepler ile açılğan davalarnıñ qurbanlarını Qırımdan çıqarmaq, işğal etilgen yarımadanıñ territoriyasından vatandaşlarnıñ qanunsız sürgün etilmesine teñ kele ve arbiy cinayet sayıla. IV Jeneva konventsiyasınıñ 76 maddesine binaen, cinayet işlegeninde qabaatlanğan vatandaşlar "işğal etilgen memlekette bulunmalı, mahküm etilse de, anda ceza müddetini keçirmelidir", — dep qayd ettiler "KrımSOS"ta.
Daa evel Qırımtatar resurs merkezi (QRM) 2017 senesinden başlap Rusiye tarafından ilhaq etilgen Qırımda Rusiye akimiyeti tarafından mahküm etilgen qırımlılarnıñ Rusiye Federatsiyasına etap etilmesi boyunca 404 adise qayd etilgenini bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.