2024 senesi Rusiye Ukrayina energetik sistemasına qarşı tahminen 1100 raketanı qullandı, dep bildirdi Ukrayinanıñ Birleşken Milletler Teşkilâtındaki (BMT) daimiy temsilcisi Serğiy Kıslıtsâ BM Telükesizlik Şurasınıñ toplaşuvında.
"Keçken cuma künü (dekabrniñ 13-nde - QA) yapılğan ücüm Rusiyeniñ tek 2024 senesi energetik infrastrukturağa yapqan 12-nci ücümidir. Bu ücümler içün Rusiye 1100 qanatlı ve ballistik raketanı qullandı. Qayd etem ki, bu, tek energetik obyektlerge endirilgen raketalarnıñ sayısıdır", — dep bildiridi o.
"İdare etilgen ava bombaları eñ öldürüci silâ türüdir. Tek bir afta içinde Rusiye ukrayin noqtalarına, em de ukrayin şeerleriniñ mesken kvartallarına 500-ge yaqın idare etilgen ava bombasını tüşürdi", — dep qayd etti Kıslıtsâ..
Dekabrniñ 13-nde "Ukrenergo" şirketi energetik obyektlerge kütleviy raketa ücümleri aqqında haber etti. Şirketniñ matbuat hızmeti bildire ki, ücüm sebebinden bugün qullanuv sıñırlav tedbirleriniñ miqdarı arttı.
Ukrayina Energetika nazirliginiñ malümatına köre, 2022 senesi oktâbr ayından berli Rusiye Ukrayina energetik infrastruktura obyektlerine biñden ziyade ücüm etti, tek bu sene ücümler neticesinde 9 GVt energiya ğayıp oldı.
Roskomnadzor Qırım.Aqiqat saytını blok etti.Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
