Qırımtatar halqı genotsidi qurbanlarınıñ hatıra kününde ukrayin artistleri "Ey, güzel Qırım" qırımtatar yırını icra ettiler. Leyha ğayesiniñ müellifi qırımtatar İsmail Kurt-Ümer.
Yırnıñ icrası ile video"Medeniy quvetler"niñ Facebook saifesinde derc etildi. Leyhağa Yarına Kvasnıy, Vitaliy Kırıçenko, Anastasiya Voytük (Banduragirl), Pavel Gots (Nazva taqımı), Serğiy Martınük (Fiolet taqımı), Mariya Kvitka, Cemil Karikov (saz/bağlama) Taras Stolâr (bandura), İsmail Kurt-Ömer qoşuldılar
"Ey, güzel Qırım — ukrayinlerniñ qırımtatar halqınen birdemliginiñ sesidir. Sekiz ukrayinalı artist, olarnıñ arasında em arbiy, em de vatandaşlar — "Ey, Güzel Qırım" qırımtatar halq yırını yırlamaq içün birleştiler. Bu yır qırımtatar sürgünligi yıllarında doğdı. O, keder, ağrı, hatıra ve evge qaytmaq ümütiniñ sesi oldı. Quralaynıñ 18-nde — Qırımtatar halqı genotsidi qurbanlarınıñ Añma kününde biz, ukrayinler, qırımtatarlarğa tek söz, muzıka, umumiy hatıra ile qol tutmaymız. Bu video birdemligimiz, umumiy acımız ve serbestlik içün umumiy küreşimizniñ numayışıdır. Biz berabermiz — cenkte, kederde, ğalebe ve evge qaytmaq hayallarında", — dep aytıla yırnıñ tarifinde.
1944 senesi quralaynıñ 18-nde sovet rejimi bütün qırımtatar halqını Qırımdan Merkeziy Asiyağa sürgün etmege başladı. Üç kün devamında 200 biñ qırımtatar zorbalıqnen demiryol vagonları ile çıqarıldı.
Quralaynıñ 18-nde Ukrayinada ve dünyada qırımtatar halqınıñ Qırımdan sürgün etilmesiniñ qurbanlarını hatırlaylar. Bu künü qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçirile.
Ukrayina Yuqarı Radasınıñ qararına binaen, quralaynıñ 18-i Qırımtatar halqı genotsidi qurbanlarınıñ Añma künü dep ilân etilgen.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.AqiqatnıñTelegram ve İnstagram saifelerinden taqip etiñiz.
