Kyivde «Pirogovo» Halq mimarlığı ve turmuşı müzeyi territoriyasında qırımtatar medeniyet müzeyini quradaq olalar.
Bunı, martnıñ 9-nda TİN binasında «Özüne sadıqlıq cinayet degil» adlı serginiñ açılışında Qırım eviniñ müdiri Ahtem Seitablayev bildirdi.
«Mına böyle bir adım içün minnetdarım. Böylece, bir-birimiz aqqında daa ziyade bilmek mümkün, qırımtatarlarnıñ medeniyetini yahşı bir seviyede taqdim etmek mümkün. Böyle bir şey, TİN, Ukraina institutı, Medeniyet nazirligi ile beraberlikte Pirogovo müzeyiniñ territoriyasında qurulacaq qırımtatar medeniyet müzeyi olacaq», – «İnterfaks Ukraina» Seitablayevniñ aytqanlarından alınıtı ketire.
Ukraina Medeniyet fondu, Qırım evi ve Ukraina institutı 2021 yıl içün "Emiyetli vaqialar" yarış programması çerçivesinde "Qırım medeniyeti" adlı ayrı bir lot azırladılar. Büyük bir medeniyet ve bediiy leyha Qırımnıñ tamır halqlarınıñ (qırımtatarlar, qırımçaqlar ve qaraylar) medeniyetini saqlap qalmaq ve inkişaf ettirmek maqsadınen kerçekleştirile.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
