Ukrayınada qanunsız sayılğan ve Moskvadan yardım alğan «DNR» silâlı gruppirovkası Donetsk vilâyetiniñ işğal etilgen yerlerine seferber etilgen rusiyeliler keldi, dep bildirdi, dep haber ete TASS Rusiye devlet agentligi.
Seferberlik sentâbrniñ 21-nde ilân etildi, cenk uruşları alanına rusiyeliler orduğa kelgeninden eñ çoq bir buçuq aftadan kelgen demek, dep qayd ete Azatlıq Radiosınıñ Rus hızmeti.
TASS haberinde rusiyeliler «intensiv uruş azırlığı» kursına başladı, dep aytıla.
Ukrayına Baş ştabı yahşı azırlıq körmegen seferber etilgen vatandaşlar blok etilgen Liman (Qırmızı Liman) şeerinde cenkleşe, dep haber etken edi.
Bu malümatnı faal cenk uruşları şaraitlerinde teşkermek imkânsız ola.
Donetsk vilâyetine kelgen arbiyler aqqında bir malümat yoq, arbiy tecribeleri barmı belli degil. Daa evel berilgen malümatqa köre, Rusiye arbiy komissarlıqları arbiy tecribesi olğan insanlarnen beraber bir vaqıt askerlik yapmağan soylarını ala.
Sentâbrniñ 29-nda Rusiye prezidenti Vladimir Putin Telükesizlik şurasınıñ toplaşuvında seferber etilgen insanlarnıñ qoşma arbiy azırlığını yapmağa talap etti.
Donetsk vilâyetinde Ukrayına ordusı bu yıl baarde Rusiye arbiyleri ve aydutlar zapt etken yerlerde muvafaqiyetli qarşı ücümler kerçekleştire. Rusiye menbaları mudafaa içün askerler yetmey, dep haber ete.
Sentâbrniñ 21-nde Rusiye prezidenti Vladimir Putin memlekette qısmiy seferberlik ilân etip, buyruq imzaladı. Rusiye akimiyeti 300 insannı seferber etmege niyetlene, dep bildirdi, amma kütleviy haber vastalarınıñ malümatına köre, bu raqam million insandan çoq ola bile.
Rusiyede seferberlik ilân etilgen soñ arbiy komissarlıq ve memuriyet binaları ateşke berile, biñlernen insan narazılıq aktsiyalarına çıqa – olarnı quva, kötekley ve tutalar, daa biñlernen kişi memleketten ketmege tırışa – Rusiyeden uçaq biletleri pek paalılaştı, qara sıñırlarında çoq kilometrli tıqanıqlıqlar peyda oldı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
