Ukrayina Keriç (Qırım) köprüni yoq etmek içün yeterli potentsialğa saiptir, amma şimdilik oña ücüm etmey, çünki Rusiye ordusı onı silâ ketirmek içün qullanmay. Bunı Ukrayina telükesizlik hızmetiniñ yolbaşçısı Vasıl Malük ICTV ukrayin telekanalına bergen intervyüsında bildirdi.
"Rusiyeliler onı tam olaraq ğayrıdan tiklemek içün çalışalar. Şimdi anda destekler zarar kördi. Olarnı ğayrıdan tiklegen soñ, belki de, potentsial olaraq, anda kene öz silâsını taşımağa başlaycaqlar. O zaman biz olarğa daa bir kere "meraba" deycekmiz. Er şeyniñ öz vaqtı bar, vaqialarnı tezleştirmeycekmiz", - dep ayttı Malük.
ICTV "Faktlar" hızmetiniñ alıp barıcısı ve baş muarririniñ sualine, Ukrainanıñ Keriç köprüni yoq etmek içün yeterli potentsialı barmı sualine cevap bergende, Malük, ebet, dep ayttı.
"Potentsial, elbette, bizde bar", - dep cevap berdi Malük.
Aynı intervyüde SBU yolbaşçısı, Rusiye öz ordusını silâ ile temin etmek içün Keriç köprüni qullanmay, dep bildirdi.
"Şimdi añlamaq kerek ki, olar onı (Keriç köprüni - QA) silâ, zarar berüv vastaları ve ilâhre ketirmek içün qullanmaylar. Bizim muvafaqiyetli yeñişlerimizden evel anda bir künde 42-den 46-ğa qadar tren keçe edi, olar silâ ve cephane taşıy edi. Bugün anda künde dört-beş adam kele. Dört yolcu aqımı, olardan biri umumiy qullanuv malları. Yani duşman bugün silâ ve zarar berüv vastalarını temin etmek içün köpürni qullanmay", - dedi Malük.
Keriç köprü ilhaq etilgen Qırımnı Rusiye ile bağlay. 2022 senesi oktâbr ayında Qırım (Keriç) köpründe patlav yüz berdi. 2023 senesi iyülniñ 17-nde Keriç köpründe daa bir patlav oldı. Rusiye akimiyeti ve quvetçileri patlavlarda ukrayin mahsus hızmetlerini qabaatladı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
