Ukrayina telükesizlik hızmetiniñ "A" mahsus ameliyatlar merkeziniñ mahsus askerleri Rusiyeniñ Kursk vilâyetinde Rusiye silâlı quvetleriniñ 488-inci gvardiya motoatıcı polkunıñ ve "Ahmat" bölüginiñ 102 arbiy hızmetçisini esir aldı, dep haber ete Azatlıq Radiosına vaziyetni resmiy şekilde izaatlamağa aqqı olmağan Ukrayina telükesizlik hızmetiniñ haberdar menbaları.
Beyanatqa köre, bu avgustnıñ 14-nde oldı ve bir seferde yapılğan Rusiye arbiyleriniñ eñ büyük esir aluvı oldı.
"Bu, Merkeziy mudafaa şurası "A" SBU askerleri tarafından keçirilgen mahsus operatsiyanıñ neticesi. Olar er taraftan pekitilgen ve betonlanğan topraq altında kommunikatsiyalar ve şahsiy erkânnıñ yaşağan yerleri, aşhane, silâhane ve atta hamamları olğan bölükni zapt ettiler ve temizlediler. Duşman esirlikke teslim olmağa azır degil edi, aşayt ve silâ yeterli edi", — dep aytıla haberde.
Bu arada Ukrayina Mudafaa nazirligi ve Ukrayina mudafaa nazirliginiñ qol tutuvı ile teşkil etilgen "Yaşamaq isteyim" arbiy esirlerge munasebet boyunca koordinatsion ştabınıñ leyhasınıñ telegram kanalı (kanal Rusiye ordusınıñ arbiy hızmetçilerini esirlikke teslim olmağa teşviq ete) avgustnıñ 14-nde Rusiye askerleriniñ bir bölügi Kursk vilâyetinde esirlikke teslim olğanını bildirdi.
Avgustnıñ 14-nde komandanlar tarafından terk etilgen 100-den ziyade rusiyeli doğru qarar alıp, esirlikke teslim oldılar, dep aytıla haberde.
Aynı Rusiye arbiy taqımı aqqında söz yürsetilgeni daa belli degil.
Ukrayina Yuqarı Radasınıñ insan aqları vekâletlisi Dmıtro Lubinets, Kursk vilâyetinde Ukrayina Yuqarı Radasınıñ ilerilemesi fonunda esirlerni deñişüv aqqında Rusiye insan aqları vekâletlisi Tatyana Moskalkova ile subet keçirdi. Bu aqta Lubinets avgustnıñ 14-nde ukrayin tele marafonı efirinde tarif etti. Onıñ aytqanına köre, subetniñ teşebbisçisi Rusiye tarafı edi?
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
