Link açıqlığı

Ukraina saylayıcılar komiteti «qırımtatar referendumını» resmiy şekilde nezaret ete bile ve eger de onıñ teşkilâtçıları ukrain ve halqara uquq aktlarına tayansa, işbu protsesske qıymet kese bilecek.

Bunı Ukraina Saylayıcı Komitetiniñ Qırım bölüginiñ başı Andriy Krisko bildirdi.

Eger de yuqarıda añılğan şeylerge riayet etmeseler, USK özü saylayıcılarnı referendum devamında qayd etilgen hususiyet ve bozuluvlar aqqında haberder etecek.

Onıñ aytqanına köre, bu mesele boyunca alınacaq qararda iradeniñ aq ve açıq-aydın bildirüviniñ printsiplerine riayet etüv büyük rol oynaycaqtır.

«Eger de referendumnıñ keçirilmesi aqqında qarar, mart 16-da ötkerilgen sahte-referendumda olğanı kibi, bu printsiplerge köre alınmasa, USK irade bildirüvniñ qıymetini bermeycek, amma saylayıcılarnı referendum devamında qayd etilgen hususiyet ve bozuluvlar aqqında haberder etecek ola», – dedi USK Qırım bölüginiñ yolbaşçısı.

Evelleri Meclisteki referendum keçirilmesi boyunca teşkiliy gruppasınıñ başı Eskender Bariyev referendum ukrain qanunlarına köre azırlaycağını aytqan edi. Onıñ aytqanı kibi, Ukrainada yerli referendumlar aqqında qanun olmasa da, memleketniñ Anayasasında halqara aktlarnıñ milliy qanunlarğa köre üstün olğanını aydınlatqan maddeler ise bardır.

Pılıp Orlıknıñ adına demokratiya İnstitutınıñ eksperti Natalâ Belitserniñ fikrince, böyle referndumnıñ keçirilmesinde 2007 senesi sentâbr 13 künü BMT Baş Assambleya tarafından qabul etilgen tamır halqlarnıñ aqqları boyunca umumiy deklaratsiyanı nazarda tutmaq kerektir.

Qırımtatar halqnıñ statusı ve özüni belgeliv aqqı boyunca referendumnıñ keçirilmesi zaruriy olğanını qırımtatar halqınıñ lideri, Ukraina halq deputatı Mustafa Cemilev bildirdi.
XS
SM
MD
LG