Bloomberg malümatına köre, taraflar Qara deñizde 30 künlik ateşkes ve energetika obyektlerine qarşı darbelerden vazgeçüvni muzakere etti.
ABD ve Ukrayina arasında Saudiy Arabistanda yañı körüşüv olacağı martnıñ 24-nde belli oldı. Kyiv ve Washington vekilleriniñ körüşüvi 12 saat devam etken Rusiye-Amerika muzakerelerinden soñ ertesi künü keçirile.
Reuters agentligi Beyaz saraydaki menbasına esaslanıp, Rusiye-Amerika muzakereleriniñ neticesinde «müsbet bir beyanat» beklenile, dep yazdı. CBS News telekanalınıñ eki menbası bildirgenine köre, beyanat Kyiv saatınen 10:00-da derc etilmeli, amma şimdilik bir şey aydınlatılmadı.
Martnıñ 23-nde Er-Riyadda Ukrayina ve ABD eyyetleriniñ ilk körüşüvi keçirildi. Ukrayina Mudafaa naziri Rustem Umerov onı «konstruktiv ve manalı» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
