Saudiy Arabistan qıralı Salman memlekette komendant saatlarını müddetsiz uzatmağa qarar aldı. Aprelniñ 12-nde SPA Devlet haber agentligi bildirgenine köre, sıñırlavlar koronavirus tarqaluvınen bağlı diger emirler kelgenine qadar uzatıldı.
Bu aqta Azatlıq Radiosı haber ete.
Saudiy Arabistan qıralı komendant saatları qararını ilk sefer martnıñ soñunda qabul etti. Sıñırlavlar aprelniñ 13-nde bitecek edi.
Başta gece komendant saatları aqqında aytıldı, amma keçken afta akimiyet Er-Riyad ve diger büyük şeerlerde 24 saatlıq sıñırlavlarnı ilân etti.
Sakinlerge tek ihtiyacları olğanda evlerini terk etmege izin berile ve tek 6:00-dan 15:00-ğa qadar.
Memlekette qırallıqnıñ 13 regionı arasında yolculıqlar yasaqlana.
Mekke ve Medinede de gece-kündüz komendant saatı bar, ve bu islâm yerleri bir qaç aftadan berli ziyaretke qapalı qala.
Saudiy Arabistan akimiyeti çetel vatandaşları içün sıñırlarnı qapattı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
