Ukraina Tış işler naziriniñ birinci muavini Emine Ceppar Saudiy Arabistan Qırallığınıñ Ukraina elçisi Muhammad Suleyman al-Musger al-Cibrin ile körüşip, işğal etilgen Qırımda insan aqları muntazam sürette bozula, dep bildirdi. Bu aqta Ukraina nazirliginiñ matbuat hızmeti haber ete.
«İşğalge razı olmağan yarımada sakinlerine qarşı Rusiye işğalci akimiyeti tarafından devam etken repressiyalar qayd etildi, diniy sebeplerden olğanlarnı eñ çoq qırımtatarlar çeke», – dep aytıla haberde.
Nazirlikniñ malümatına köre, körüşüv vaqtında subetçiler eki memleketniñ halqara teşkilâtlar çerçivesinde işbirligini ve destegini muzakere etti.
«Emine Ceppar Ukrainanıñ İslâm İşbirligi Teşkilâtında közetici statusını aluv teşebbüsine büyük diqqat ayırdı, bunıñ sayesinde islâm dünyasınıñ devletleri ile yañı iş imkânları olacaq, Ukrainanıñ musulman cemiyeti inkişafına yardım olacaq», – dep qoştı matbuat hızmeti.
Bundan evel Ukraina Tış işler nazirliginde Ceppar Filistinniñ Ukraina elçisi Gaşem Dacani ile körüşip, Rusiye işğal etken Qırımdaki insan aqları ve serbestligi aqqında malümat berdi.
Ukraina prezidentiniñ ofisi Qırımda diniy sebeplerden taqip ve tintüvlerge qarşı narazılıq bildirdi.
Birleşken Milletlerniñ insan aqları Yuqarı komissarınıñ idaresi avgustnıñ 27-nde Qırım ve Donbasta insan aqlarınıñ bozuluvına dair yañı maruzasını derc etti. Maruzada qayd etilgenine köre, eñ çoq qanunsız tutuv ve apis cezaları, uzun mahkeme esnasları, advokat aqqınıñ olmaması, işkence ve sert yanaşuv, semereli uquqiy imaye vastalarınıñ olmaması ola.
İyülniñ başında BM insan aqları Yuqarı komissarı Michelle Bachelet Qırımdaki insan aqları vaziyetine dair maruzanı taqdim etip, yarımadada işkence qullanıla ve söz serbestligi sıñırlanıla, dep bildirdi.
Rusiye Tış işler naziri Sergey Lavrov işğal etilgen Qırımda insan aqlarınıñ bozuluvı aqqında laflar uydurıla, dep bildirgen edi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
