Dekabrniñ 21-nde «Sarı şerit» areketiniñ faalleri Qırımda ve Donetsk vilâyetinde ukrayin tirenüviniñ timsallerinen yañı fotoresimlerni derc etti.
«Sarı şerit» areketiniñ faalleri vaqtınca işğal etilgen topraqlarnıñ çeşit yerlerinde kene aktsiyalar keçirdiler. Tirenüv timsalleri Gorlovkada Gorkiy parkında ve Aqmescitte Gagarin ve Aleksandrovskiy parklarında peyda oldı. Bundan ğayrı, mesken yerlerde ve şeer civarlarında stikerler tarqatıldı», – dep fotoresimniñ altındaki haberde.
«Sarı şerit» qayd etkenine köre, «Qırım ve Donetsk vilâyeti yüzlernen kilometrnen ayırılsa da, olarnı umumiy arzu – evlerine, Ukrayinağa qaytmaq birleştire».
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.
Areketniñ eñ belli aktsiyalarından biri - sarı şeritlerniñ asılması ve yarımadada «Qırım Ukrayinadır» yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
