«Sarı şerit» Ukrayinağa qoltutuv şiarlarınen stikerlernen fotoresimlerni derc etti. Berilgen malümatqa köre, olar Aqmescit, Aqyar, Kezlev, Yalta, Canköy ve Ermeni Bazarda tarqatıldı.
«Qırım platformasınıñ sammiti yüksek siyasiy seviyede keçirilgende Qırımdaki insanlarımız o yerde Qırım Muhtar Cumhuriyeti Ukrayina olğanını hatırlata», – dep aytıla areketniñ haberinde.
Areket «Qırım platforması» sammitiniñ mevzularından biri Qırım ve onıñ tarihiy Rusiye mensüpliginen bağlı sahte malümatlarnıñ red etilmesi ola, dep qoştı.
«İşğal etilgen Qırımda er kün toqtamayıp tirengen yüzlernen insan adından aytamız – Qırım Ukrayina edi, Qırım Ukrayina ola, Qırım Ukrayina olıp qalacaq», – dep qoşalar arekette.
Sentâbrniñ 11-nde Kyivde «Qırım platforması» sammiti keçirildi. Qırımnı işğalden qurtaruv halqara meydançığınıñ iştirakçileri dördünci kere körüşe.
Bu yıl sammitte 60-tan çoq iştirakçi bar edi. Olarnıñ arasında Litvaniya prezidenti Gitanas Nauseda, Hırvatistan Cumhuriyetiniñ baş naziri Andrey Plenkoviç, Latviya baş naziri Evika Silinâ. Matbuat konferentsiyasında olar Ukrayinağa qoltutqanlarını qayd etkenler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
