«Sarı şerit» areketiniñ faalleri bildirgenine köre, eki kün devamında Qırımda Ukrayina tirenüviniñ 200-den çoq yañı timsali yerleştirildi. Yañı aktsiyalarnıñ fotoresimleri Yalta, Kezlev, Aqyar ve Aqmescitte areketniñ Telegram kanalında derc etilgen edi.
«Farqlı şeerlerniñ tanılğan ve yürekke hoş kelgen yerleri kene stiker ve sarı şeritlernen yaraştırıldı – umumen yarımadada soñki eki künde tirenüvniñ 200-den çoq yañı timsali peyda oldı, Aqmescitte ise faaller er bir ukrayinalı bilgen «Ї» arfini yazdı. Çünki işğal – vaqtınca bir şey, Qırım ise Ukrayinadır», – dep yazdı faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Areketniñ eñ meşur aktsiyalarından biri – yarımadada sare şeritlerniñ bağlanması ve «Qırım – Ukrayinadır» sözlerinen yazuvlı şiarlarnıñ yapıştırılması. Faaller Boyko dağında da Ukrayina bayrağını tiklegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
