«Sarı şerit» areketiniñ faalleri Aqmescit, Yalta ve Canköyde Ukrayinağa qoltutuv şiarları ve Ukrayina tirenüviniñ diger timsallerini tarqattı, dep bildirdi. Fotoresimler areketniñ Telegram kanalında yerleştirildi.
«Yazuvlı şiarlar ve şeritler Aqmescit soqaqlarında, hususan Solneçnıy aralığında ve Birlik soqağında, Yalta ve Canköy duraqlarında tarqatıldı. Vaziyet ne qadar qıyın olsa da, tirenüv şeer bütünley azat etilgenine qadar devam etecek, merkeziy meydanlarında sabırsızlıqnen beklegen Ukrayina bayrağımız köterilgenine qadar devam etecek», – dep yazdı fotoresim altında faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
