«Sarı şerit» areketiniñ faalleri Aqmescit, Aqyar, Kezlev, Keriç, Bağçasaray ve Yaltada keçirgen «Qırım – Ukrayinadır» adlı aktsiyanıñ fotoresimlerini derc ete. Fotoresimler aprelniñ 26-nda Telegram kanalında peyda oldı.
«Siyasetçilerniñ beyanatları ve subetler çoq oldı. Ukrayina Silâlı quvtelerini ve Ukrayina bayrağınıñ qaytmasını beklegen adiy Qırım sakinleri dünyağa er kün hatırlata: Qırım – Ukrayinadır! Vaqtınca işğal etilgen Qırımda biñlernen faalimiz bar. Rusiyeliler «bizim» dep aytqan şeerlerde bile, Aqyar ve Keriçte graffiti, şerit ve levhalar peyda ola. Zorbalıqsız, vatandaş narızılığımız devam ete ve etecek», – dep yazdı fotoresim altında faaller.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Areketniñ eñ meşur aktsiyalarından biri – yarımadada sare şeritlerniñ bağlanması ve «Qırım – Ukrayinadır» sözlerinen yazuvlı şiarlarnıñ yapıştırılması. Faaller Boyko dağında da Ukrayina bayrağını tiklegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
