«Sarı şerit» areketiniñ iştirakçileri Aqmescit ve Yaltada yañı tirenüv aktsiyasını keçirdi. Bu aqta faaller Telegram kanalında bildirdi.
Areket Aqmescitniñ Kirov ve Skvoznaya soqaqlarındaki Rusiyege qoltutuv divar resimi yanında ve Yaltadaki graf Mordvinov sarayı ögünde cemaat naqliyatınıñ duraqlarında Ukrayinağa qoltutuv levhaları ve sarı şeritlerni tarqattı.
«İşğalciler ne yapsa yapsın, tirenüv tisalleri yarımadada kene ve kene peyda ola. Qırım ealisi Rusiye işğalini tanımay ve Ukrayinanı bekley. Ve mıtlaq körer!», – dep qayd etti «Sarı şerit».
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Areketniñ eñ meşur aktsiyalarından biri – yarımadada sare şeritlerniñ bağlanması ve «Qırım – Ukrayinadır» sözlerinen yazuvlı şiarlarnıñ yapıştırılması. Faaller Boyko dağında da Ukrayina bayrağını tiklegen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
