Link açıqlığı

Saatnıñ esas haberi

«Sarı şerit» areketiniñ faalleri Qırım şeerlerinde ve Aqyarda yañı aktsiyalar keçirilgenini ilân etti (fotoresim)


«Sarı şerit» areketiniñ yazuvlı şiarı, arşiv fotoresimi
«Sarı şerit» areketiniñ yazuvlı şiarı, arşiv fotoresimi

Yanvarniñ 16-nda «Sarı şerit» areketiniñ faalleri ukrayin tirenüviniñ timsallerinen yañı fotoresimlerni derc etip, Aqmescit, Aqyar ve Kefe şeerlerinde yañı aktsiyalar olacağını ilân etti.

«Kefeniñ Yubileynıy parkında «Sarı şerit» areketiniñ faalleri bir qaç divar resimi yaptı. Aqmescitniñ Botanik bağçasında küneş saatı etrafında Ukrayinağa qoltutuv stikerlerini tarqattıq. Aqyarnıñ soqaq ve parklarında da bir çoq tirenüv timsali peyda oldı», – dep aytıla fotoresimlerniñ altındaki yazıda.

Aynı vaqıtta, faaller yañı aktsiyalar keçirmek içün daa muqayt olmaq kerek olğanını ayta, çünki «FSB vatandaşlarnıñ tintüvlerini keçire: em evlerge sürip kire, em de soqaqlarda insanlarnı toqtata».

«Lâkin bizni bu şekilde toqtatıp olacaqlarını tüşünseler, pek yañılalar», – dep bildirdi areket faalleri.

«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.

Areketniñ eñ belli aktsiyalarından biri - sarı şeritlerniñ asılması ve yarımadada «Qırım Ukrayinadır» yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.

Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.

XS
SM
MD
LG