«Sarı şerit» areketiniñ faalleri Aqmescit, Yalta ve Kefede yerleştirilgen Ukrayina tirenüvi timsalleriniñ yañı fotoresimlerini derc ete.
Bu şeerlerniñ parklarında yerleştirilgen sarı şerit ve stikerlerniñ fotoresimleri areketniñ Telegram kanalında derc etildi. Faallerniñ aytqanına köre, Qırımda olarnıñ sayısı artmağa devam ete.
«Er kün areketke daa çoq insan qoşula – çünki şeerlerde levhalar köre, ve bu ümüt nurını saça. Tirenüv devam ete ve Ukrayina topraqları bütünley azat etilgenine qadar devam etecek, çünki Qırım – Ukrayinadır», – dep aytıla fotoresim altındaki haberde.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Simeiz, Balıqlava kibi kiçik şeerlerniñ sakinleri qoşula.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
