Rusiyede içtimaiy ağlarnıñ qullanıcıları ve yerli akimiyet vekilleri iyülniñ 1-ne keçer gecesi Ukrayina uçucısızlarınıñ ücümi aqqında bildire.
Saratov ve Engels sakinleri patlavlar aqqında yazdı. Rusiyeniñ Saratov vilâyetiniñ valisi Roman Busargin «uçucısızlarnıñ telükesi» aqqında bildirdi.
Rosaviatsiya malümatına köre, Saratov, Qazan, Ülyanovsk ve Nijnekamsk ava limanları işini toqtattı.
Bundan ğayrı, iyülniñ 1-ne keçer gecesi Rusiye akimiyeti işğal etilgen Qırımnı Rusiyege bağlağan Keriç köpründe areketni toqtattı. Telegram kanallarında ücüm aqqında haberler peyda oldı.
Rusiye Mudafaa nazirligi urıp tüşürilgen 60 Ukrayina uçucısızı aqqında bildirdi, 17-si Qırımda, 16-sı Rusiyeniñ Rostov vilâyetinde tüşürilgen eken. Darbe zararları aqqında malümat yoq.
Engels şeeri yaqınlarında «Engels-2» arbiy uçaq alanı bar, anda Rusiyeniñ 22-nci ağır bombardıman ava diviziyasınıñ Tu-95MS ve Tu-160 uçaqları tura.
Nijnekamskta Rusiyeniñ eñ büyük cermay zavodlarından biri «Taneko» yerleşe. Yanında Yelabuga şeeri bar, anda «Şahed» Rusiye dronları toplanğan «Alabuga» mahsus iqtisadiy alanı çalışa.
Bu obyektler uçucısızlarnıñ ücümlerine ilk sefer oğramay.
Ukrayina akimiyeti ücüm aqqında malümatnı şimdilik izaatlamadı.
Rusiyeniñ Ukrayinağa qarşı büyük istilâsı başlağan soñ Rusiye regionları top ve dronlarnıñ ücümlerine muntazam sürette oğray. Rusiye Mudafaa nazirligi raketalar ve dronlar urulğanını bildire. Kyiv bu haberlerni ekseriy allarda izaatlamay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
