Sarabuz qasabasında patlav sesleri eşitildi, dep haber ete yerli telegram kanalları.
Haber etilgeni kibi, patlavdan pencreler titregen ve burum-burum tütün körüngen.
Sarabuz qasabasınıñ işğal yolbaşçısı İgor Çiçkinniñ sözlerine köre, bu ava mudafaası sistemasınıñ işidir.
"Ava mudafaası sisteması işlegendir. İç bir tütün yoq", - dedi o.
Rusiye tarafdarı bloger Aleksandr Talipov Sarabuz qasabası civarında pilotsız uçaq urıp tüşürilgenini bildirdi.
Sarabuz qasabasında büyük bir Rusiye arbiy uçaq bazası bar. Anda Rusiye Ukrayinağa qarşı cenkte qullanğan Su-24M bombardıman uçaqları ve Su-25 ücümcileri yerleşe.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayıina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
