Qırım telegram kanalları işğal etilgen Qırımnıñ çeşit regionlarında uçucısızlarnıñ ücümi ve Rusiye mudafaasınıñ cevap işi aqqında yazalar.
"Krımskiy veter" telegram kanalı abunecileriniñ malümatına esaslanıp yazğanına köre, "Aqmescit rayonında Sarabuz tarafından köterilgen tuman körüne". Rusiye Ava quvetleri ava mudafaası Or Qapıda dronlarğa ateş aça.
Canköyde uçucısızlarnıñ darbesi neticesinde eletrik ast stantsiyası zarar kördi, dep bildire "Krımskiy veter" abunecileri. Başta ast stantsiyağa dron parçaları tüşti, soñra doğrudan ücüm oldı, şeerniñ ve Canköy rayonınıñ bir qısmında ışıq yoq. Telegram kanalınıñ abunecileri haber etkenine köre, "Canköyde ast stantsiya pek yana, bütün şeer qaranlıqta".
Saat 17:34-te Qırımnıñ Rusiye ükümeti Rusiye Mudafaa nazirliginiñ malümatına esaslanıp telegram kanalında haber etkenine köre, ava mudafaasınıñ nevbetçi vastaları Qırımda ve Azaq deñizinde 28 uçucısıznı yoq etti (22 – işğal etilgen Qırımda, 6-sı – Azaq deñizinde).
Rusiye akimiyeti Keriç köprüni qapattı, dep haber etildi. Monitoring telegram kanalları dron darbesiniñ telükesi aqqında yazalar.
Saat 16:31-de Aqyar şeer yolbaşçısı Mihail Razvojayev ava telükesi aqqında haber etti. Telüke tahminen 16 daqqa devam etti.
Kündüz Qırımnıñ telegram kanalları Keriçte, Qurman ve Canköy rayonlarında Rusiye Federatsiyası ava mudafaasınıñ iş sesleri aqqında bildirgen edi. Rusiye Mudafaa nazirligi Qırımda saat 8:00-den 13:00-ke qadar tüşürilgen 10 dron aqqında esabat berdi. Tüşürilmegen uçucısızlarnıñ sayısı aytılmay.
2022 senesinden berli Qırım yarımadası aman-aman er kün uçucısız ve raketalarnıñ ücümlerine oğray, çoqusı allarda bu malümat tasdıqlansa bile, Rusiye Mudafaa nazirligi ya da Rusiye akimiyeti arbiy obyektlerge darbe endirilgenini inkâr ete.
