"Sarı şerit" faalleri işğal etilgen Aqmescitte Ukrayina destegine varaqalar tarqattı. Bu aqta areketniñ telegram kanalında haber etile.
"Bazı areketler adiy körüne, amma olar ukrayinler 10 yıllıq işğalden soñ duşmandan qorqmayıp, muqavemet köstermege devam etkenleri aqqında küçlü bir mesaj yollaylar", – dep aytıla haberde.
"Sarı şerit" teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.
Areketniñ eñ belli aktsiyalarından biri - sarı şeritlerniñ asılması ve yarımadada "Qırım Ukrayinadır" yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
