"Sarı şerit" areketiniñ faalleri Rusiye tarafından ilhaq etilgen Qırım ve Donetskten Ukrayinağa yollanılğan Yañı yıl hayırlavları ile fotoresimlerni derc etti. Bu aqta malümat dekabrniñ 31-nde areketniñ telegram kanalında peyda oldı.
"Bugün daa bir qıyın yılnıñ soñu. İşğal altındaki insanlar içün keder, qorqu, Rusiye teşviqatı, tintüvler, qorquzuvlarnen tolu edi. Amma aynı zamanda tirenüv, küreş ve ümütnen de. Yañı yıl arzusını aytmaq kerekmey, çünki epsiñiz ne arzu etkenimizni ve ne içün çalışqanımıznı bilesiñiz. Bu sebepten laf etmeymiz, amma devam etemiz", — dep yazdı faaller.
"Sarı şerit" qayd etkenine köre, "Qırım ve Donetsk vilâyeti yüzlernen kilometrnen ayırılsa da, olarnı umumiy arzu – evlerine, Ukrayinağa qaytmaq birleştire".
"Sarı şerit" teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.
Areketniñ eñ belli aktsiyalarından biri — sarı şeritlerniñ asılması ve yarımadada "Qırım Ukrayinadır" yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
