"Sarı şerit" areketiniñ faalleri Qırımda ukrayin tirenüviniñ timsalleriniñ fotoresimlerini derc etip, Ukrayina destegine nevbetteki aktsiyasını keçirgenlerini bildirdiler.
Faallerniñ aytqanına köre, yañı aktsiya Aqmescit, Aluşta ve Yaltada keçirildi.
"Sarı şerit" areketinniñ qarşılıq timsalleri QMC paytahtında "Qırım kooperativ institutı" filialları, Bitak mikrorayonı ve Yalta yalısı yanında peyda oldı. Vaqtınca işğal etilgen Qırım şeerleriniñ mesken malleleri, dağ ve qoruqlarnı şeritler ve el yapımı ukrayin bayraqları yaraştırmaqta", — dep haber ete "Sarı şerit" telegram-kanalında.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.
Areketniñ eñ belli aktsiyalarından biri - sarı şeritlerniñ asılması ve yarımadada «Qırım Ukrayinadır» yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
