"Sarı şerit" areketiniñ faalleri Aqyarda nevbetteki ukrayin tarafdarı aktsiyasını keçirip, şeerniñ qurulışınıñ 200 yıllığı munasebetinen hatıra işareti yanında stikerlerni yerleştirdiler.
"Stikerler endi Aqyar şeeriniñ 200-yıllığına bağışlanğan hatıra işareti ve Boris Mihaylov soqağı, 4 adresi boyunca yerleşken 3-nci poliklinika yanında peyda oldı", — dep bildirdi faaller öz telegram kanalında.
"Sarı şerit" teşkilâtı — Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areket teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faal ola, hususan Aqmescit, Yalta, Kezlev ve Kefede, soñki vaqıtları ise olarğa küçük şeerlerniñ Simeiz, Balıqlava sakinleri qoşula.
Areketniñ eñ belli aktsiyalarından biri — sarı şeritlerniñ asılması ve yarımadada "Qırım Ukrayinadır" yazısı ile plakatlarnıñ yapıştırılmasıdır. Yaqında faaller Boiko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
