"Sarı şerit" faalleri işğal etilgen Qırımnıñ farqlı şeerlerinde yañı aktsiya keçirdiler. Mütenasip malümat areketniñ telegram kanalında peyda oldı.
Qayd etilgenine köre, Ukrayina destegine timsaller Yalta, Kezlev, Keriç, Aqyar ve Aqmescitniñ belli yerlerinde peyda oldı.
"Sarı Şerit" faalleri küreşke devam ete! Farqlı şeerlerniñ belli ve ürmetli yerleri tekrar stiker ve sarı şeritlernen yaraştırıldı. Çünki Qırım Ukrayinadır", — dep aytıla beyanatta.
Sentâbrniñ 13-nde berilgen malümatqa köre, "Sarı şerit" faalleri ilhaq etilgen Qırımda "Biz barmız" aktsiyasını keçirdiler. Qabaatlav timsalleri Aqmescit, Aqyar, Kezlev ve Gurzufta peyda oldı.
«Sarı şerit» teşkilâtı – Rusiyeniñ vaqtınca işğal etken Ukrayina topraqlarında ukrayinlerniñ qarşılıq areketidir. Areketniñ teşkilâtçılarınıñ aytqanına köre, yerastı faallerniñ sayısı bir qaç biñden ziyade ve ep arta. Olarnıñ aytqanına köre, Qırımdaki cemiyeti eñ faaldir, hususan Aqmescit, Yalta, Kezlev ve Kefede, soñki vaqıtları ise olarğa Semey, Balıqlava kibi kiçik şeerlerniñ sakinleri qoşula.
Areketniñ eñ belli aktsiyalarından biri - sarı şeritlerniñ asılması ve yarımadada «Qırım Ukrayinadır» yazısı ile plakatlarnıñ yapıştırılmasıdır. Yaqında faaller Boyko dağında Ukrayina bayrağını köterdiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
