Aktsiya Aqmescitte keçirildi. Faaller "Saylavlar olmaycaq. Mahkeme olacaq, Gaaga olacaq" ve "İşğalcilerniñ saylavlarını boykot et" şiarları ile levhalar ve graffiti tarqattılar.
Daa evel Qırım.Aqiqat mühbiri bildirgenine köre, Aqmescit sakinlerini ilk sefer şahsen, kvartiralar boyunca kezinti vaqtında, Qırımda qanunsız şekilde keçirilgen Rusiye prezidenti saylavlarına davet etmege başladılar.
Rusiye prezidenti saylavları 2024 senesi mart 15-17 künleri keçirilecek. Rusiye anayasasına kirsetilgen deñişmeler neticesinde Putin beşinci (ve altıncı) sefer prezident ola bile. O, ilk sefer vazifege 2000 senesi kirdi.
Resmiy olaraq Qırım yarımadası olğan Ukrayina, em de dünyanıñ çoqusı memleketleri ve halqara teşkilâtlar, şu cümleden BM ve OSCE, Rusiye tarafından işğal etilgen (2014 senesinden başlap bugünge qadar) ukrayin topraqlarında keçirilgen saylavlarnı tanımay ve takbih ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
