Aqyarda «Sarı şerit» areketiniñ faalleri Ukrayına risaleleri, grafiti ve sarı şeritlerni kene tarqattı. Böyle fotoresimler faallerniñ Telegram kanallarında derc etildi.
Aqyarda «Deokupatsiya bude» («İşğalden azat etilecek» – QA) ve «Ukrayınskıy prarok bude v Sevastopoli» (Ukrayına bayrağı Aqyarda olacaq – QA) metinli risaleler peyda oldı.
«Sarı şerit» vatandaş areketiniñ faalleri Aqyarda areket etmege devam ete. Aqyarda faallerimizniñ sayısı arta, bu aqta yañı graffiti ve sarı şeritler ayta, işğalcilerge tam mesac kete: Aqyar Ukrayına edi ve böyle qalacaq», – dep aytıla haberde.
Fevralniñ 18-nde Qırım.Aqiqat mühbiri Aqyarnıñ soqaqlarında sarı şeritler asıldı, dep haber etti. Mühbirniñ malümatına köre, şeritler Gagarip caddesinde Rusiye arbiy bölükleriniñ yaqınlarında, Bolşaya Morskaya soqağındaki bala meydançığında ve Odesskaya soqağınıñ eñüvinde köründi.
«Jovta striçka» Ukrayına areketi bildirgenine köre, «vaqtınca işğal etilgen Qırımda vatandaş tirenüvi quvetlerini arttıra». Teşkilât, yarımadada Ukrayına areketiniñ aman-aman 1000 faali buluna, dep qayd ete.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
