Saqta kimligi belli olmağan qadın şeer kirişinde, Kezlev şossesi rayonında tiklengen qırımtatar tamğalı hatıra taşını bozmağa tırıştı. Qadın maşinasınıñ töpesine çıqıp, çöküçnen hatıra taşına urdı.
Bu aqta faal Mansur Teyfuk Qırım.Aqiqatqa tarif etti.
Onıñ aytqanına köre, tamğalı stelada zarar izleri qaldı. Onıñ bildirgenine köre, olıp keçkenlerni yaqındaki tükân ve qavelerniñ hadimleri kördi, olar qadınnı toqtattı.
Daa soñra adise yerine Rusiye gvardiyası ve politsiyasınıñ hadimleri keldi. Olar qadınnı tutıp oldı, maşinasını ise tahliye etkenler. Bundan ğayrı, adise yerine akimiyetke qol tutqan «İnkişaf» qırımtatar cemiyeti» teşkilâtınıñ reisi Eskender Bilâlov keldi.
Qırımdaki Rusiye politsiyası ve Rusiye gvardiyası olıp keçken adiseni resmiy şekilde izaatlamaylar. Diger menbalar bu aqta haber etmey.
Daa evel Seyitler rayonınıñ hadimleri qırımtatar mezarlarına zarar ketirildi, dep bildirgen edi.
2019 senesi noyabr ayında işğal altındaki Qırımnıñ musulman mezarlığında daa bir vandallıq areketi aqqında belli oldı. Qırımtatar faali Zair Smedlânıñ malümatına köre, Qurman rayonınıñ Petrovka köyünde kimligi belli olmağan insanlar mezarnıñ baştaşını sındırdı.
Bundan evel Qırımnıñ Yedi Quyu rayonında kimligi belli olmağan insanlar Bagerovo qasabasında musulman mezarlığında 15 baştaşnı bozıp ketti. Daa soñra bunı yapqanlar tapıldı, yerli gençler yapqan, dep bildirildi.
