Aprelniñ 9-nda aqşam Qırımnıñ ğarbindeki Saq ve Novofedorovkada patlavlarğa oşağan küçlü sesler eşitile. Bu aqta «Krımskiy veter» Telegram kanalı abunecileriniñ malümatına esaslanıp yaza.
Yerli vaqıtnen saat 21:10-da «Krımskiy veter» Novofedorovkadaki Rusiye arbiy uçaq alanından Rusiye qırıcıları köterildi, dep yazdı.
«Saq civarında Rusiye ava mudafaası ateş aça, Novofedorovka uçaq alanında qırıcılar uçurıldı», – dep aytıla haberde.
«Krımskiy veter» yerli sakinlerniñ malümatına esaslanıp, dronlarnıñ ücümi altında Saq rayonındaki Şelkoviçnoye (Temeş) köyü civarında radiolokatsion stantsiya buluna, dep bildirdi. Bu malümatnı başqa menbalarda tasdıqlamaq şimdilik imkânsız ola.
Rusiye monitoring Telegram kanalları Saqtan Novofedorovka tarafına uçqan uçucısızlarnıñ ücümi aqqında da yaza. Anda Aqyar, Kaça ve Kezlev içün uçucısız telükesi aqqında tenbileyler.
Rusiye akimiyeti bu malümatnı şimdilik izaatlamay. Rusiye monitoring kanalları seslendirgen malümatnı mustaqil menbalar vastasınen teşkermek şimdilik imkânsız ola.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
