Saq rayonınıñ Otar Moynaq (Uyutnoye) köyüniñ sakinlerini plâjlarda peyda olğan ağır tehnika raatsızlay. Bu aqta Rusiye Devlet dumasınıñ Qırım deputatı Ruslan Balbek bildirdi.
Onıñ qayd etkenine köre, yerli akimiyet turistik infrastrukturanı abadanlaştırmağa istey, amma sakinler memnün degil.
«Taraflarnen laf etip, tögerek masa keçirmege teklif ettim ve qasaba yolbaşçısınen bu tedbirniñ teşkil etilüvi aqqında añlaştım. Yerli faal, alim, memuriyet, Ekologiya nazirligi, Turizm nazirligi, prokuratura vekillerini ve plâj kiracılarını davet etermiz», – dep yazdı Balbek Facebookta.
Onıñ aytqanına köre, tögerek masanı online ötkermege planlaştırıla.
Fevral ayında da bu köyniñ plâjında yapılğan qurucılıq sebebinden qavğa çıqqan edi. Kezlevde Rusiye kontrolindeki şeer şurasınıñ deputatı Roman Voloşin tutuldı. Rusiye quvetçileri onı Otar Moynaq köyüniñ plâjını abadanlaştırğan şirket aqqında «yamanlağan malümat tarqatqanı içün» para talap etkeninde qabaatladı.
Otar Moynaq – işğal etilgen Qırımnıñ sabıq prokurorı, Rusiye Devlet dumasınıñ deputatı Natalya Poklonskayanıñ tuvğan köyüdir. Bu sene fevral ayında qız qardaşı Yelena Osadçaya mesken yeriniñ yolbaşçısı vazifesine tayin etildi.
