Türkiye bankları, ABD tarafından ekinci sanktsiyalardan qorqıp, Rusiye banklarınen çalışmağa istemeyler. Bu aqta "Kommersant" neşri yaza.
Türkiyedeki aman-aman bütün banklar Rusiyedeki kredit teşkilâtlarınen bağlarını kesip, olarnıñ ödemelerini toqtatqanlar. "Kommersant" menbasınıñ aytqanına köre, istisnalar tek Rusiyedeki ecnebiy banklarnıñ iştirakçilerine ait.
Maliye bazarınıñ iştirakçileri deyler ki, 2023 senesi dekabr ayında, Avropa Birliginiñ 12-nci sanktsiyalar paketi işke tüşürilgen soñ ve ABD prezidenti Joe Biden ekinci sanktsiyalar aqqında ferman imzalağan soñ vaziyet kerginleşti. Bu eki vesiqa da Rusiyeniñ Ukrayinağa istilâsına cevap olaraq peyda oldı.
Türkiye bankları, ABD sanktsiyalar cedveline kirsetilüvi ve böylece olarnıñ dollar ödemelerinden ayırılması yerli müşterilerni de çetke çekeceginden qorqalar. "Kommersant"nıñ subetdeşleri deyler ki, eger de Türkiye bankları içün telükeler pek yüksek olsa, Rusiye içün yekâne effektiv variant - Türkiye ile başqa memleketlerniñ bankları vastasınen meselâ, SNG bankları vastasınen esaplaşmaq.
Rusiye ve Türkiye bankları "Kommersant"nıñ soravlarına cevap bermediler.
Daa evel belli olğanı kibi, Rusiye müşterilerinen iş şaraitlerini Qıtay bankları da sertleştireler. Olar ABD tarafından ekinci sanktsiyalar tayin etilmesinden qorqalar.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
