2018 Senesi ABD sanktsiyalarına oğrağan «Mriya Resort & SPA» şifahane-kurort kompleksi Rusiye ükümetinden «2018 senesi turizm inkişafı içün» million ruble mukâfat aldı. Böyle bir qarar Rusiye ükümetiniñ saytında derc etildi.
Vesiqağa binaen, böyle mukâfatnı 10 şirket alacaq, qalğan doquzı Rusiye regionlarında çalışa, hususan – Tümen, Oröl, Leningrad, Tver vilâyetlerinde ve Krasnodar ülkesinde.
Rusiye ükümeti qayd etkenine köre, mukâfat alacaq namzetler saylanğanda «olarnıñ içtimaiy ve iqtisadiy qıymeti, Rusiyedeki turist sanayısına qoşqan issesine» emiyet berildi.
Daa evel Qırımnıñ Rusiye yolbaşçısı Sergey Aksenov bildirdi ki, «Mriya Resort & SPA» öteline Yaltada şarap kompleksiniñ qurucılığı içün topraq damartısını ayırılacaq.
Qırımnıñ yalı boyundaki Mriya Resort & SPA oteli 2014 senesi sentâbrniñ 12-nde sanktsiyalarğa oğrağan Rusiyeniñ «Sberbankı» ile alâqaları bar olğanı içün ABD sanktsiyalar cedveline kirsetilgen edi.
ABD, 2014 senesi Qırım işğaline cevap olaraq Rusiye şahısları ve şirketlerine qarşı sanktsiyalar ilk sefer sanktsiya kirsetken edi. Donbasta silâlı zıddiyet başlağan soñ siyasiy sanktsiyalarğa iqtisadiy tedbirler de qoşuldı. ABD ile beraber Avropa Birligi ve Ukraina akimiyeti sanktsiyalar kirsete.
