Ukraina Yuqarı Radasınıñ insan aqları vekâletlisi Lüdmila Denisova, Rusiye halqara sanktsiyalarnıñ küçleştirilmesine cevap olaraq ukrain mabüslerine, şu sıradan qırımlılarğa bedeniy ve ruhiy basqını arttıra dep saya. Bunı o Telegram kanalında bildirdi.
"Halqara sanktsiyalarğa cevap olaraq Rusiye qanunsız tutulğan Ukraina vatandaşlarına qarşı qılınuvını küçleştire - ukrain diplomatlarımıznıñ vatandaşlarımıznıñ yoqlavını red ete, bedeniy ve ruhiy basqını arttıra ve böyleliknen halqara ve atta Rusiye qanunlarını boza", - qayd etti ombudsmen.
Hususam, onıñ aytqanına köre, aqlarınıñ bozulmaşından Cemil Gafarov, Vladimir Dudka, İgor Kiyaşko, Aleksandr Marçenko, Tofik Abdulgaziyev, Enver Ömerov, Şaban Ümerov, Müslim Aliyev, İnver Bekirov, Enver Seytosmanov, Teymur Abdullayev, Enver Mamutov, Vladimir Yakimenko, Ruslan Zeytullayev, Andrey Zahtey, Aleksey Bessarabov, Üzeir Abdullayev, Rustem İsmailov, Viktor Şur, Aleksandr Şumkov, Vadim Siruk, Emir-Üsein Kuku, Valentin Vıgovskiy, Zevri Abseitov, Rustem Abiltarov, Remzi Memetov, Gennadiy Limeşko, Refat Alimov ve Sergey Bugayçuk zarar kördi.
O, Rusiye halqara mesuliyetlikni közde tutıp, Ukraina vatandaşları olğan adamlarının aqlarını saqlamalı ve qırımtatar halqına qarşı basqını toqtatmalı.
2019 senesi iyünniñ 10-nda Aluşta, Qarasuvbazar ve Aqmescit rayonlarında keçirilgen tintüvlerden soñ 8 kişi tutuldı: Ruslan Nagayev, Eldar Kantimirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye FSBsi, tahqiqat tedbirleri 205.5 maddesine istinaden (terror teşkilâtını quruv ya da anda iştirak etüv) açılğan cinaiy dava çerçivesinde keçirile ve «Hizb ut-Tahrir» diniy teşkilâtınen bağlı, dep bildirdi.
Ukraina uquq qoruyıcı organları Rusiye quvetçileriniñ Qırımda keçirgen tintüvleri sebebinden cinaiy tahqiqat başlattı.
Ukraina Tış işler nazirligi, Qırımdaki apiske aluvlarğa qarşı narazılıq bildirip, Rusiyege qarşı siyasiy, iqtisadiy ve sanktsiyalar basqısını quvetleştirmege çağırdı.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
