İyünniñ 4-ü sabasına Aqyarda bir COVID-19 hastası qayd etildi. Şeerniñ Rusiye ükümetiniñ matbuat hızmeti bildirgenine köre, hasta Sankt-Peterburgdan qayttı ve özüni izolâtsiya etken edi.
«Bugünki künde yuqunç hastahanesinde 79 insan közetüv altında buluna, №9 şeer hastahanesinde – 81. Yaşağan yerinde 1248 insan közetile. İyünniñ 3-nde keçiş noqtalarında 114 kişiniñ eksperss tedqiqi yapıldı», – dep bildirdi müessise.
Yılnıñ başından, akimiyetniñ malümatına köre, Aqyarda 171 insan koronavirus yuqunçına oğradı. 141 kişi tüzeldi, 3 kişi vefat etti.
Keçken künü Qırımda altı koronavirus hastası qayd etildi, bir insan vefat etti. Umumen Qırımda 405 koronavirus hastası qayd etildi. 29-ı çetelden keldi, 74-ü – qomşu Rusiyeden. 285 insan tüzeldi. 12 COVID-19 hastası vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
