Sankt-Peterburgnıñ Nevskiy caddesinde dekabrniñ 2-nde Rusiyeniñ Ukrainağa qarşı istilâsına qarşı, şu cümleden Rusiye tarafından Keriç boğazında zapt etilgen Ukraina deñiz askerlerine qoltutuv aktsiyaları olıp keçti, dep yaza Radio Svobodanıñ rus hızmeti.
Aktsiyada 50-ge yaqın insan iştirak etti.
Aktsiyalarnıñ teşkilâtçısı, «Solidarnost» Peterburg demokratik teşkilâtınıñ faali Olga Smirnovanıñ fikirince, Ukraina deñizcileriniñ zapt etilmesi Rusiyeniñ işğal etken Ukraina topraqlarınıñ alanını arttırmaq ıntıluvı ola. Aktsiyalarnıñ iştirakçileri Ukraina deñizcilerini Vatanlarına qaytarmağa, Ukrainağa zapt etilgen mal-mülkini qaytarmağa, Ukrainanıñ Azaq deñizindeki limanlarınıñ qamaçavını toqtatmağa ve Ukraina gemilerini zapt etkenlerni cezalamağa talap etti.
Aralarında bir qaçı yaralı olğan Ukraina deñiz askerleri Qırımdan Moskvağa avuştırılğan edi. Rusiye tahqiqatçıları «sıñırdan qanunsız keçkenlerine dair» malümat bermelerini talap ete. Bu qabaatnıñ neticesi ciddiy apis cezaları olması mümkün.
Narazılıq aktsiyasınıñ iştirakçileri dey ki, Ukraina deñizcilerine cenk esiri statusı berilmeli, amma olar cinayet işlegen şahıslar olaraq mahküm etile. Faaller Rusiye içün telükeli olmağan çetel gemilerine ateş açqan Rusiye arbiyleriniñ areketlerine açuvlanğanını bildirdi.
Narazılıq aktsiyası vaqtında bir qadın faalge ücüm etip, yazuvlı şiarını yırttı. Telükesizlik maqsadınen faaller Nevskiy caddesi boyunca dağılmayıp, biri-biriniñ yerine yazuvlı şiarlarnen kele edi. Narazılıq aktsiyalarında «Solidarnost», «Yabloko», «Bessroçnıy protest» ve diger Rusiye firqa ve areketleriniñ faalleri iştirak etti. Bir saat devam etecek narazılıq aktsiyası 3 saat devam etti.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Aqmescit ve Keriç mahkemeleri Keriç hastahanesinde bulunğan 3 yaralanğan askernen beraber 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen Ukraina deñizcilerini cenk esiri dep tanıdı.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Noyabrniñ 29-nda Donald Trump Putin ile körüşüvini Ukraina gemileri ve deñizcileriniñ zapt etilmesi sebebinden lâğu etti.
