Rusiye vatandaş faalleri gruppası yanvarniñ 18-nde Sankt-Peterburgnıñ Nevskiy caddesine çıqıp, işğal etilgen Qırımda ve Rusiyede apiske alınğan qırımtatarlarğa qoltutuv yazuvlı şiarlarını köterdi.
Bu işğal etilgen Qırımdaki repressiyalarğa qarşı müddetsiz narazılıq aktsiyasıdır, dep bildire Sever.Realii mühbiri.
Aktsiya iştirakçileri yazuvlı şiarlarda qırımtatarlarnı taqip etüv tarihını tasvir etti: «fevral 26 davasından» başlap sanki Rusiyede yasaqlanğan «Hizb ut-Tahrir» teşkilâtından kelgen terror telükesi sebebinden qırımtatarlarğa tanıtılğan qabaatlavlarğa qadar.
Faaller bu telükeni sahte sayıp, milliy ve diniy sebeplerden taqip içün manaçıq ola, dep ayta.
İştirakçilerniñ aytqanına köre, apiste yatqan qırımtatarlarğa basqı yapıla – olarnı psihiatrik ekspertizadan keçmege zorlaylar. Faallerniñ fikirince, bunıñ qanuniy bir sebebi yoq. Dava boyunca qabaatlanğanlarğa tibbiy yardım acele kerek olsa da kösterilmey.
Aktsiya teşkilâtçısı Olga Smirnovanıñ fikirince, qırımtatar aqlarınıñ bütün bozuluvları aqqında aytmaq kerek.
«Evelden insanlarnıñ mecburiy psihiatrik ekspertizağa yollanılğanını körsek, şimdi bu bir şablon oldı, aman-aman bütün qırımlı mabüslerniñ davaları oña oğray. Bir taraftan, olarnı bu şekilde maneviy ceetten qırmağa tırışalar, diger taraftan, mahkeme oturışuvlarını bu şekilde – qabaatlanğanlar olmasa – keçirmek daa da qolay ola. İnsanlarnı işkence şaraitlerinde tutalar, suvuq, böcek tolu kameralarda tutalar, insanlarnıñ irinli yaraları da ola», – dep ayttı o.
Narazılıq bildirgenler «Qırım birdemligi» cemaat birleşmesi başlatqan «Olarnıñ sesi ol» fleşmob teşebbüsine qoltutmağa teklif etti.
Fleşmob iştirakçilerine video muracaatını çıqarıp, bir siyasiy mabüs aqqında tarif etmege ve levhanı içtimaiy ağda #olarnıñ_sesi_ol heştegi ile qoymağa teklif etilgen edi.
Faaller bütün siyasiy mabüslerini Rusiye ve Qırım apishanelerinden azat etmege ve siyasiy sebeplerden taqip etilüvini toqtatmağa talap etti.
Hatırlatamız, Moskvada ve Sankt-Peterburgda 2019 senesi dekabrniñ 18-nde faaller qırımtatarlarğa qoltutmaq ve işğal altındaki yarımadada repressiyalarğa qarşı çıqmaq içün bir kişilik aktsiyalarını keçirdi.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
