Sankt-Peterburgda (Rusiye) politsiya qırımtatarlarğa qol tutuv aktsiyalarında iştirak etken faal Dmitriy Negodinni tuttı. Onı izinsiz yürüşte iştirak etkeninde qabaatlaylar, dep bildire Azatlıq Radiosı Rusiyede narazılıq aktsiyalarında tutulğanlarnıñ taqdirini taqip etken «OVD-İnfo» resursına esaslanıp.
Berilgen malümatqa köre, Negodin Ladojskiy vokzalında tutuldı. Faal politsiya bölügine ketirilip, şahsiy eşyaları alındı ve kütleviy tedbir keçirüv qaidelerini bozğanına dair protokol tizildi.
Bundan evel ev çıqışında politsiya qırımtatarlarğa qol tutuv aktsiyasınıñ diger iştirakçisi Olga Smirnovanı tuttı.
Qırımtatarlarğa qol tutuv aktsiyası er aynıñ 18-nde keçirile. Narazılıq aktsiyalarınıñ iştirakçileri qırımtatarlarnıñ milliy ve diniy mensüplik sebebinden taqip etilüvini toqtatmağa, Rusiye apishanelerinde tutulğan Ukraina vatandaşları olğan siyasiy mabüslerni azat etmege ve siyasiy sebeplerden açılğan cinaiy ve memuriy davalarnı qapatmağa talap ete.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
