Sankt-Peterburgdaki Botkin hastahanesinde koronavirus hastası can berdi. Bu aqta vali Aleksandr Beglov bildirdi, dep yaza «Fontanka» Rusiye haber resursı.
Şeer yolbaşçısınıñ aytqanına köre, ölgen kişi regionğa martnıñ 1-nde çetelden keldi, ve tek 19 künden soñ diagnozı qoyuldı. «Virus 14 kün degil, 28 künge qadar yaşay ve tek soñra körüne bile», – dep qayd etti Beglov, dep bildire Sever.Realii.
Ölümniñ kerçek sebepleri tek yarıp baquvdan soñ belli olacaq.
Peterburg sakini Rusiyede koronavirustan ölgen altıncı kişi oldı. Martnıñ 28-nde Peterburgda 11 yañı koronavirus hastası qayd etildi. Umumen şeerde 37 hasta bar.
Martnıñ 28-ne qadar Rusiyede 1264 koronavirus hastası qayd etildi. Martnıñ 27-nde memleketniñ 26 regionında 228 yañı hasta qayd etildi. Martnıñ 28-nde Orenburgda koronavirus hastası öldi, dep haber etildi. Bu Moskvada qayd etilmegen ilk ölüm oldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
