Aprelniñ 18-nde Moskva ve Sankt-Peterburgda faaller Rusiyede taqip etilgen qırımtatarlarnıñ destegine bir kişilik piketler keçirdiler.
«Strategiya 18» teşebbüsiniñ malümatına köre, «qırımtatarlarnıñ destegine, Qırımnıñ işğaline ve basqılarğa qarşı» er ay olğan aktsiya Sankt-Peterburgda Nevskiy caddesinde olıp keçken ve piket vaqtında iştirakçilerinden biri Asan Mümci tutılğan.
«Tutılmasınıñ resmiy sebebi, Sankt-Peterburg ükümetiniñ 121 nomeralı, er angi bir kütleviy tedbirlerniñ keçirilmesi faktik yasaq noqtasına qadar sıñırlağan «koronavirus» qararı oldı. Kerçek sebep ise, Asannıñ saylağan plakatnıñ metini olğanına inanamız. Bu plakat 2017 senesinden işğalniñ yıllığı munasebeti ile piketlerde ilk sefer peyda olğanından berli artqaç sıñir reaktsiyasına sebep ola», –dep haber ettiler faaller.
Berilgen malümatqa köre, Asan Mümcini polisniñ 76-ncı bölügine ketirgenler, anda oña qarşı memuriy uquq bozma aqqında protokol tizilgen (8.6.1 madde). Onı saat 22:00 yibergenler, plaktnı ise tutıp alğanlar.
«Bundan soñ aktsiya devam etti, diger iştirakçiler Nevskiy caddesinde turmağa tırıştı, amma polis yaqalavnen qorqutıp, qanunsız arektelerni toqtatmağa talap etip, keçkenlernen laf etmege bermey edi. Böyle etip polis aktsiyanıñ keçirilmesine keder etti», – dep qayd ettiler aktsiya iştirakçileri.
Bundan ğayrı aprelniñ 18-nde piketler Moskvada Arabatta keçirilgen. «Keçkenler bugün kendi tutmay ediler... Küfür sözler, açıq tecavuz... Destek içün yahşı sözler ve közyaşlar da edi... Meraqlanğanlar çoq edi. Kelip, tafsilâtlarnı soray ediler...», – haber ettiler faaler.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
