İşğal etilgen Qırımdan kelgen "Nefes" Qırımtatar bala ansambliniñ reberlerini Peterburgda polis hadimleri "büyük belâğa yol bermemek içün ekstremist teşkilâtınıñ timsaline" cevap bergenleri içün yaqaladılar, dep bildirdi Peterburg şeer yolbaşçılığınıñ milletlerara munasebetler komitetiniñ reisi Oleg Kapitanov. Bunı "Rotonda" neşiri haber ete.
Peterburg memurınıñ qayd etkenine köre, Quralaynıñ 17-de üç adamnıñ tutulmasına sebep olğan Qırımtatar bayrağı uquqiy ceetten yasaq etilmegen, amma "assosiasion sıra ve renklerden sebep" polis hadimlerinde sual doğurğan. Kapitanov tutuluvnı "añlaşılmamazlıq" dep adlandırdı ve şeer akimiyeti ansambl ile işbirlik yapacağını ayttı.
Ansambl Sankt-Peterburgğa Aqmescitten kelgen, bu birinci sefer degil. Petropavlovskaya qalesi boyunca ekskursiya vaqtında balalar ellerinde Rusiye, Qırım ve Qırımtatar bayraqları ile milliy urbalarda fotoğa çıqqanlar. Bundan soñ polis üç insannı tuttı, şu cümleden ansamblniñ reberi Sevila Halilova ve Peterburg Qırımtatar cemiyetiniñ reisi Radion Esmedlâyevni. Geceni olar polis bölüginde keçirgenler, ve olarğa qarşı izinsiz miting ve ekstremistik timsaller numayışı aqqında protokol tizgenler. Quralaynıñ 18-nde yaqalanğanlar mahkemege ketirilgen, o vaqıt bu dava kütleviy haber vastalarında derc etilgeninden soñ, büyük rezonans doğurdı. Mahkeme protokollarnı polis hadimlerine qaytılğan.
Tutulğanlardan biri, Radion Esmedlâyev, polis hadimleri "aşırğanını, amma işini yapqanını" ayttı. Sevilya Halilova "Fontanka"ğa, akimiyet Qırımtatar bayrağını qanuniy olaraq ilân etse, bu onıñ içün esas tazminat olacaq, dep ayttı.
Bildirilgeni kibi, balalar qamaçavda olğan Leningrad sakinleri, kadetler ve kursantlar ve Rusiyeniñ Ukrayinağa qarşı cenk iştirakçileri ögünde çıqışta bulunmaq kerek ediler. Bu çıqış lâğu etildi, amma ansambl mahkeme bitken soñ "Rusiye menim tarihım" parkında çıqışta bulundı.
Qırımtatar bayrağı Qırımtatar milliy teşkilâtları, şu cümleden Rusiye akimiyeti tarafından yasaq etilgen Qırımtatar Milliy Meclisiniñ teşkilâtları tarafından qullanıla, bu bayraq Rusiyede ekstremist olaraq tanılmay, demek yasaq degil.