Sankt-Peterburgda politsiya Rusiye ve Qırımda tutulğan ukrainalılarğa qoltutuv aktsiyalarınıñ iştirakçilerini «profilaktik subetlerge» çağıra. Bu aqta Sankt-Peterburgnıñ qırımtatar faali İlyas Eşref Qırım.Aqiqatqa tarif etti.
«Zenaatdaş faaller politsiya teşkerüv keçirip, bizni qıdırğanını bildirdi. Men olarnı evge kirsetmedim, amma olar kelmege devam ete, olarnı evge alğanlarnı endi politsiyağa subetlerge çağıralar. Bunı cinaiy qıdıruv yapa. Qırımlı siyasiy mabüslerge qoltutuv ve Qırımda farqlı fikirlerni taqip etüvge qarşı aktsiyalarda iştirak etkenimizni begenmeyler», – dep tarif etti faal.
Sankt-Peterburg politsiyası bunı izaatlamay.
Sankt-Peterburg ve Moskvada yaşağan Rusiye faalleri «Strategiya-18» müddetsiz aktsiyasına birleşken edi. Bu ad 1944 senesi mayısnıñ 18-nde olğan qırımtatar sürgünliginiñ künü ile bağlıdır. Er aynıñ 18-nde faaller soqaqlarğa çıqıp, işğal etilgen Qırım vaziyetini, insan aqları bozulğanını tarif eteler.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
