Kreml bildirgenine köre, al-azırda ABD prezidenti Donald Trump ve Rusiye prezidenti Vladimir Putin arasında Rusiyeniñ Ukrayinağa qarşı cenkini toqtatuv sammiti ne vaqıt ötkerilecek belli degil.
Ne Putin, ne de Trump körüşüvniñ tam kününi aytmadı, başta ciddiy azırlıq ve vaqıt kerek, dep ayttı oktâbrniñ 21-nde jurnalistlerge Rusiye prezidentiniñ spikeri Dmitriy Peskov.
Onıñ qoşqanına köre, olacaq sammitten evel “zor iş” yapılmalı.
“Bu da vaqıt ala bile. Şunıñ içün tam künler belgilenmedi”, – dep ayttı Peskov.
Moskvanıñ sammit künlerinen bağlı bir fikri barmı sualine böyle cevap berdi: “Yoq, bir şey bilmeymiz”.
Trump oktâbrniñ 16-nda Putinnen laf etken soñ, ABD devlet kâtibi Marco Rubio ve Rusiye Tış işler naziri Sergey Lavrov bu afta Budapeştte olacaq liderler sammitinden evel, ABD prezidentiniñ aytqanına köre, eki afta içinde körüşe bile. Moskva olacaq körüşüvniñ tam müddetini aytmadı.
CNN Beyaz saray vekiliniñ malümatına esaslanıp, ABD devlet kâtibi Marco Rubio ve Rusiye zenaatdaşı Sergey Lavrovnıñ beklenilgen körüşüvi başqa vaqıtqa qaldırıldı ve bu afta olmaycaq, dep bildirdi. Menbalardan biri haber etkenine köre, Rubio ve Lavrovnıñ Rusiyeniñ Ukrayinağa qarşı cenkiniñ toqtatıluvınen bağlı farqlı beklevleri bar.
Rusiye Tış işler nazirligi körüşüv başqa vaqıtqa qaldırılmadı, çünki “planlaştırılmağan edi”. “Añlaşma yapılmağan bir şeyni başqa vaqıtqa qaldırmaq mümkün degil. Tünevin bazı ğarp menbalarınıñ yazğanlarını biz tasdıqlamadıq. Böyle bir körüşüvniñ müddeti ve yerinen bağlı bir malümatımız yoq edi”, – dep ayttı Rusiye Tış işler naziri Sergey Râbkov.
