Aluşta "Hizb ut-Tahrir" davası boyunca 18 yılğa mahküm etilgen ve bu sene arman ayında sağlıq vaziyeti sebebinden cezahaneden azat etilgen mustaqil musulman cemiyetiniñ sabıq reisi Lenur Halilovnı Rusiye quvetçileri kene apiske aldı.
"Qırım birdemligi" birleşmesi advokat Emil Kurbedinovğa atıf etip bildirgenine köre, o, Aqmescitniñ Demiryol mahkemesinde video konferentsiya rejiminde oturışuvda iştirak etken, bu, RF Arhangelsk vilâyet mahkemesiniñ qararınen oldı, o, Halilovnıñ sağlıq alı sebebinden azat etilmesi aqqında qararnı lâğu etti.
Rusiye devlet qabaatlayıcısınıñ (prokurorınıñ) fikrince, mahkeme, Halilovnı umumiy sebeplerden tüzetüv müessisesinde tutmaq mümkün olmağanına dair tibbiy komissiyanıñ qararına esaslanıp, "onıñ cezasını çekmekten azat etilmesi şart olğanını köstermey".
Advokat Emil Kurbedinov orta küz ayınıñ 13-nde qabul etilgen mahkeme qararını "qanunsız, esassız" ve "insaniyetsiz" dep adlandırdı.
"Bu qarar Lenura ağanı bu koloniyada ağır hastalıqnen ölümge yollay", — dep qayd etti o.
Kurbedinovnıñ aytqanına köre, Rusiye mahkemesiniñ qararı şekilde şikâyet etilecek.
Hatırlatamız, 57 yaşındaki Aluştalı imamnı qanunsız cezanı çekmekten sağlıq alına köre azat etken ediler, onda onkologiya hastalığı tapılğa nedi.
Lenur Halilov — Aluşta mustaqil musulman cemiyetiniñ sabıq yolbaşçısıdır.
2019 senesi ilk yaz ayınıñ 10-nda Aluşta, Qarasuvbazar ve Aqmescit rayonlarında qırımtatarlarnıñ evlerinde keçirilgen tintüvlerden soñ sekiz kişi tutuldı: Ruslan Nagayev, Eldar Kantemirov, Ruslan Mesutov, Lenur Halilov, Riza Ömerov, Enver Ömerov, Ayder Cepparov ve Eskender Suleymanov.
Rusiye akimiyeti Nagayev ve Umerovnı Rusiyede terroristik tanılğan, amma bir çoq memlekette milliy qanunlar seviyesinde sıñırsız faaliyet köstergen "Hizb ut-Tahrir" islâm siyasiy firqasınen alâqaları bar dep qabaatladı.
2021 senesi arman ayınıñ 16-nda Cenübiy okrugınıñ arbiy mahkemesi "Aluştadaki Hizb ut-Tahrir gruppasınıñ" mabüsleri Ruslan Nagayev, Eldar Kantimirov, Ruslan Mesutov ve Lenur Halilovnıñ ükmüni çıqardı. Erkekler terror faaliyetinde qabaatlanıp, 13, 12 ve 18 yıl sert rejimli koloniyada qalmasına üküm etildi.
